နိုဝင်ဘာ ၂၊ ၂၀၁၉။ ရန်ကုန်။

SocDemAsia ၏ စီစဉ်မှုဖြင့် လူမှုဖူလုံရေးစနစ်(ကျန်းမာရေးမူဝါဒ) ရေးဆွဲနိုင်ရေးအတွက် အလုပ်ရုံဆွေးနွေးပွဲကို လူ့ဘောင်သစ်ဒီမိုကရက်တစ်ပါတီနှင့် ရှမ်းတိုင်းရင်းသားများဒီမိုကရေစီအဖွဲ့ချုပ်တို့ ပူးပေါင်း၍ နိုဝင်ဘာ ၂ ရက်နေ့တွင် ရန်ကုန်မြို့၌ ပြုလုပ်ခဲ့ပါသည်။ အဆိုပါဆွေးနွေးပွဲတွင် လုံလောက်သည့် ကျန်းမာရေးစောင့်ရှောက်မှု လူတိုင်းရရှိနိုင်သည့် လူမှုဖူလုံရေးစနစ်တရပ်တွင် ထည့်သွင်းရေးဆွဲသင့်သည့် အချက်အလက်များ၊ လိုအပ်ချက်များကို ဆွေးနွေးခဲ့ကြပါသည်။

12►

အောက်တိုဘာ ၃၀၊ ၂၀၁၉။ ရန်ကုန်

လူ့ဘောင်သစ်ဒီမိုကရက်တစ်ပါတီ အလုပ်သမားရေးရာကော်မတီ ရန်ကုန်တိုင်းအလုပ်အဖွဲ့၏ လုပ်ငန်းညှိနှိုင်းအစည်းအဝေးကို အောက်တိုဘာ ၃၀ ရက်နေ့လည်ပိုင်းတွင် ပါတီဌာနချုပ်ရုံး၌ ပြုလုပ်ခဲ့ပါသည်။ အစည်းအဝေးတွင် ပါတီအထွေထွေအတွင်းရေးမှူး(၁) ဒေါ်နှင်းနှင်းမွှေးက အလုပ်သမားလူတန်းစားအပေါ် ပါတီ၏ အလေးအနက်ထားရှိမှု၊ အလုပ်သမားထု၏ လက်ရှိအခြေအနေများနှင့် အစည်းအဝေးခေါ်ယူရခြင်းရည်ရွယ်ချက်တို့ကို ရှင်းလင်းတင်ပြခဲ့ပါသည်။ ထို့နောက် အလုပ်သမားရေးရာကော်မတီတာဝန်ခံ ဦးငွေလင်းက အလုပ်သမားအရေးဆောင်ရွက်နေသည့် အဖွဲ့အစည်းများ၊ အလုပ်သမားသမဂ္ဂများ၊ အလုပ်သမားအခွင့်အရေးလှုပ်ရှားမှုများနှင့် ကော်မတီက ဆက်စပ်ဆောင်ရွက်ထားသည်များကို မိတ်ဆက်ရှင်းပြခဲ့ပါသည်။ အလုပ်အဖွဲ့ဝင်များကလည်း ဆောင်ရွက်ထားသည့်လုပ်ငန်းများနှင့် အခက်အခဲများကို တင်ပြပြီး အကြံပြုဆွေးနွေးခဲ့ကြပါသည်။ ကော်မတီအနေဖြင့် အလုပ်သမားအရေးကို ပိုမိုထိရောက်စွာ ဆောင်ရွက်နိုင်မည့် ရှေ့လုပ်ငန်းစဉ်များကို ဆွေးနွေးအတည်ပြုပြီးနောက် တာဝန်ခွဲဝေခဲ့ကြပါသည်။

၂၀၁၉၊ အောက်တိုဘာ ၂၁ – ၂၂ မန္တလေး။

ဖက်ဒရယ်အခြေခံသဘောတရားဆွေးနွေးပွဲကို အောက်တိုဘာ ၂၁ – ၂၂ ရက်နေ့တို့တွင် မန္တလေးမြို့၌ ပြုလုပ်ခဲ့ပါသည်။ လူ့ဘောင်သစ်ဒီမိုကရက်တစ်ပါတီနှင့် ဖက်ဒရယ်သင်တန်းအဖွဲ့တို့ ပူးပေါင်းပြုလုပ်ခြင်းဖြစ်သည်။ ဆွေးနွေးပွဲသို့ မန္တလေး၊ တံတားဦး၊ စစ်ကိုင်း၊ ကျောက်ဆည၊် စဥ့်ကိုင်၊ ပုသိမ်ကြီး အစရှိသည့်မြို့နယ်များမှ နိုင်ငံရေးပါတီခေါင်းဆောင်များ၊ နိုင်ငံရေးအကျဉ်းသားဟောင်းများ၊ အရပ်ဖက်အဖွဲ့အစည်းများ၊ နိုင်ငံရေး တက်ကြွလှုပ်ရှားသူများ၊ အလုပ်သမားသမဂ္ဂခေါင်းဆောင်များ၊ ဗကသများ၊ DPNS ပါတီဝင်များ၊ တောင်သူလယ်သမားများ တက်ရောက်ခဲ့ကြပါသည်။ ပထမနေ့တွင် ပြည်သူလူထုအတွင်း ဖက်ဒရယ်အသိအမြင်များ ပြန့်ပွါးစေရန် ဆွေးနွေးပွဲကျင်းပရခြင်းဖြစ်ကြောင်း DPNS မန္တလေးတိုင်းကော်မတီဥက္ကဋ္ဌ ဦးကျော်ကျော်စိုးက ရှင်းလင်းပြောကြားခဲ့ပါသည်။ ထို့နောက် FTT ဆရာများက ဖက်ဒရယ်စနစ်၏ အခြေခံများ၊ ဖက်ဒရယ်စနစ်နှင့် အခြေခံဥပဒေ၊ မတူကွဲပြားမှုများကို စီမံခန့်ခွဲခြင်း၊ လူနည်းစုအခွင့်အရေးများကို ကာကွယ်ခြင်း ခေါင်းစဉ်များဖြင့်လည်းကောင်း၊  ဒုတိယနေ့တွင် ဖက်ဒရယ်စနစ်၏ အခြေခံများ၊ ဖက်ဒရယ်စနစ်တွင် လုပ်ပိုင်ခွင့်အာဏာများ ခွဲဝေခြင်း၊ ဒေသန္တရအစိုးရများ၊ ဘဏ္ဍာငွေကြေးဆိုင်ရာ စီမံခန့်ခွဲခြင်း ခေါင်းစဉ်များဖြင့် ဆွေးနွေးပေးခဲ့ကြပါသည်။

123►

၂၀၁၉၊ အောက်တိုဘာ၊ ၁၉။ မန္တလေး။

I School Myanmar က စီစဉ်ကျင်းပသည့် “သဟဇာတဖြစ်မှုနှင့် လူတိုင်းအကျုံးဝင်မှု” Peace Forum ကို
၂၀၁၉ အောက်တိုဘာ ၁၉ ရက်နေ့တွင် မန္တလေးမြို့ အောင်မြင်ခြင်းဟိုတယ်၌ ပြုလုပ်ခဲ့ပါသည်။ နံနက်ပိုင်းဆွေးနွေးပွဲတွင် DPNS တွဲဖက်အထွေထွေအတွင်းရေးမှူး(၁) ဒေါ်နှင်းနှင်းမွှေး လည်း ပါဝင်ဆွေးနွေးခဲ့ပါသည်။ ထိုသို့ဆွေးနွေးရာ၌ ဒီမိုကရေစီစံနှုန်း ၃ ခုဖြစ်သည့် လွတ်လပ်ခြင်း၊ တန်းတူခြင်းနှင့် သွေးစည်းချစ်ကြည်ခြင်းတို့ကို မဖော်ဆောင်နိုင်သည့်အတွက် ငြိမ်းချမ်းရေးမရရှိနိုင်သေးသည့်အခြေအနေနှင့် အမျိုးသမီးများ၊ လူငယ်များ နိုင်ငံရေးတွင် ပိုမိုပါဝင်လာစေရေးအပေါ် ပါတီ၏အလေးထားမှုကို တင်ပြဆွေးနွေးခဲ့ပါသည်။ နိုင်ငံရေးပါတီဝင်များ၊ မန္တလေးတိုင်း လွှတ်တော်ကိုယ်စားလှယ်များ၊ လူထုအခြေပြု အရပ်ဖက်အဖွဲ့အစည်းများ၊ မသန်စွမ်းအဖွဲ့အစည်းများ၊ LGBT အဖွဲ့များ၊ မီဒီယာများ ဆွေးနွေးပွဲတက်ရောက်ခဲ့ကြပါသည်။