Month: August 2016

၂၀၁၆၊ ဩဂုတ်လ ၂၈ ရက်နေ့မှ ၃၁ ရက်နေ့အထိ ပြုလုပ်မည့် A Social Democratic Asia: Inclusive Policy Formulation Seminar ကို နီပေါနိုင်ငံမြို့တော် ခတ္တမန္ဒူ ရှိ Park Village Hotel တွင် ယနေ့နံနက် ၉:၃၀ နာရီတွင် စတင်ကျင်းပခဲ့ပါသည်။ ဖွင့်ပွဲသို့ နီပေါကွန်ကရက်ပါတီ ခေါင်းဆောင်တဦးဖြစ်သည့် နီပေါနိုင်ငံဒုဝန်ကြီးချုပ် တက်ရောက်ပြီး အမှာစကား ပြောကြားခဲ့ပါသည်။

ထို seminar သို့ အိမ်ရှင် နီပေါကွန်ကရက်ပါတီ ၊ ဒိန်းမတ် ဆိုရှယ်ဒီမိုကရက်ပါတီ၊ ဖိလစ်ပိုင်နိုင်ငံမှ Akbayan ပါတီ၊ မြန်မာနိုင်ငံမှ လူ့ဘောင်သစ်ဒီမိုကရက်တစ်ပါတီ(DPNS) နှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)၊ Social Democratic Asia Network မှ အတွင်းရေးမှူးအဖွဲ့တို့ တက်ရောက်ခဲ့ကြပါသည်။

မြန်မာပါတီစုံဒီမိုကရေစီအစီအစဉ်(DIPD)မှ စီစဉ်ကျင်းပသော ဖက်ဒရယ်မူဝါဒရေးရာ နိုင်ငံရေးစကားဝိုင်းကို ရန်ကုန်မြို့ Park Royal ဟိုတယ်၌ ၂၆၊ ၈၊ ၁၆ ရက်နေ့ နံနက် ၉:၀၀ နာရီမှ ၁၂:၀၀ နာရီအထိ ပြုလုပ်ခဲ့ပါသည်။ ဆွေးနွေးပွဲတွင် သဘာဝသယံဇာတဘဏ္ဍာငွေ မျှဝေရေး မူကွဲများအကြောင်းကို ဆရာမော်ထွန်းအောင်(Natural Resource Governance Institute)က ရှင်းလင်းတင်ပြခဲ့ပြီး တက်ရောက်လာသော နိုင်ငံရေးပါတီခေါင်းဆောင်များက သိလိုသည်များကို မေးမြန်း ဆွေးနွေးခဲ့ကြပါသည်။ ၎င်းဆွေးနွေးပွဲသို့ လူ့ဘောင်သစ်ဒီမိုကရက်တစ်ပါတီ အထွေထွေအတွင်းရေးမှူး ဦးငွေလင်းနှင့် ဗဟိုစည်ရုံးေးရးကော်မတီဝင် ဦးအောင်မျိုးဦးတို့ တက်ရောက်ဆွေးနွေးခဲ့ကြပါသည်။

လူ့ဘောင်သစ်ဒီမိုကရက်တစ်ပါတီ ဗဟိုဦးဆောင်ကော်မတီ လုပ်ငန်းညှိနှိုင်းအစည်းအဝေးကို ၂၁၊ ၈၊၂၀၁၆ နေ့တွင် ရန်ကုန်မြို့၊ ဆိပ်ကမ်းသာလမ်းရှိ ပါတီဌာနချုပ်ရုံးခန်း၌ ပြုလုပ်ခဲ့ရာ သက်ဆိုင်ရာကိစ္စရပ်များအလိုက် ကျွမ်းကျင်သည့် ဗဟိုစည်းရုံးရေး ကော်မတီဝင်အချို့ကိုပါ ဖိတ်ကြား၍ ဆွေးနွေးခဲ့ကြပါသည်။ အစည်းအဝေးတွင် ပြည်ထောင်စုငြိမ်းချမ်းရေး ညီလာခံ(၂၁ ရာစုပင်လုံ)နှင့် ပတ်သက်သည့် သဘောထား၊ ရွေးကောက်ပွဲအနိုင်မရပါတီ ၇၀ အပေါ်ထားသည့် NRPC ၏ စဉ်းစားဆောင်ရွက်နေမှုအပေါ် သဘောထား၊ ၂၀၁၆ ခုနှစ် ပါတီလုပ်ငန်းစဉ်များအတွက် အချိန်ဇယားနှင့် တာဝန်ယူ ဖေါ်ဆောင်ကြမည့် ရဲဘော်များကို သတ်မှတ်တာဝန်ပေးခြင်း၊ စည်းရုံးရေးကော်မတီများ ကျစ်လျစ်ခိုင်မာရေး၊ အမျိုးသမီးများ အလုပ်အဖွဲ့ ဖော်ဆောင်ရေး၊ ပါတီစည်းရုံးရေးစာစဉ် ထုတ်ဝေဖြန့်ချိမှု စသည့်ကိစ္စရပ်များကို ဆွေးနွေးညှိနှိုင်းခဲ့ကြပါသည်။

ပညာရေးစနစ်ပြုပြင်ပြောင်းလဲရေး နိုင်ငံလုံးဆိုင်ရာကွန်ရက်(NNER)၏ အလုပ်ရုံဆွေးနွေးပွဲကို ၂၀၁၆၊ ဩဂုတ်လ ၁၄ ရက်နေ့က မကွေးမြို့၊ ကပ်ကျော်ပညာပါရမီကျောင်း၌ ပြုလုပ်ခဲ့ရာ NNER လုပ်ငန်းအဖွဲ့ဝင်များ၊ NNER ပြည်နယ်နှင့်တိုင်း ကွန်ရက်အဖွဲ့ဝင်များ တက်ရောက်ခဲ့ကြပါသည်။ ဆွေးနွေးပွဲတွင် NNER၏ ပညာရေးမူဝါဒများကို ပြည်သူလူထုကြား၌ ပိုမိုသိရှိနားလည် လက်ခံလာနိုင်စေရန် တိုက်တွန်းနှိုဆော်သည့် သင်တန်းများပြုလုပ်ရာတွင် ကိုင်စွဲရမည့် သင်ရိုးညွှန်းတမ်းအခြေခံမူများကို ဆွေးနွေးခဲ့ကြပါသည်။ NNER လုပ်ငန်းအဖွဲ့နှင့် ပြည်နယ်-တိုင်း ကွန်ရက်များ၏ လက်ရှိအခြေအနေများ၊ အခက်အခဲများ၊ ဆောင်ရွက်ထားရှိချက်များကိုလည်း အသီးသီး တင်ပြခဲ့ကြပြီး အောက်တိုဘာ ၆ လပတ်အစည်းအဝေးအတွက် ကြိုတင် ပြင်ဆင်ရန်ထားလိုအပ်သည့် အချက်အလက်များကိုလည်း ဆွေးနွေးခဲ့ကြပါသည်။

ပညာရေးစနစ်ပြုပြင်ပြောင်းလဲရေး နိုင်ငံလုံးဆိုင်ရာကွန်ရက် (NNER)၏ လုပ်ငန်းညှိနှိုင်းအစည်းအဝေးကို ၂၀၁၆၊ ဩဂုတ်လ ၁၃ ရက်နေ့ညနေပိုင်းတွင် မကွေးမြို့ ကပ်ကျော်ပညာပါရမီကျောင်း၌ ပြုလုပ်ခဲ့ပါသည်။ အစည်းအဝေးသို့ NNER လုပ်ငန်းအဖွဲ့ဝင်များ၊ NNER ပြည်နယ်နှင့်တိုင်း ကွန်ရက်အဖွဲ့ဝင်များ၊ ဒေသခံကျောင်းသားသမဂ္ဂအဖွဲ့ဝင်များ တက်ရောက်ခဲ့ကြပါသည်။ အစည်းအဝေးတွင် လာမည့် အောက်တိုဘာလ ၁ ရက်နှင့် ၂ ရက်နေ့များတွင် မကွေးမြို့၌ ကျင်းပပြုလုပ်မည့် NNER ပြည်နယ်နှင့်တိုင်း ကွန်ရက်များ၏ ၆ လပတ်အစည်းအဝေးနှင့် ဟောပြောဆွေးနွေးပွဲအတွက် အသေးစိတ် အချက်အလက်များကို ညှိနှိုင်းတိုင်ပင်ခဲ့ကြပါသည်။

ပညာရေးစနစ်ပြုပြင်ပြောင်းလဲရေး နိုင်ငံလုံးဆိုင်ရာကွန်ရက်(NNER) မကွေးကွန်ရက်မှ စီစဉ်ကျင်းပသော ပညာရေးဟောပြောဆွေးနွေးပွဲကို ၂၀၁၆၊ သြဂုတ်လ ၁၃ရက်နေ့ နံနက် ၉:၀၀ နာရီက မကွေးဟော်တယ်ခန်းမ၌ ပြုလုပ်ခဲ့ပါသည်။ ဟောပြောပွဲ၌ ဆရာဦးခင်မောင်ကြင်က ပညာရေးဖွံ့ဖြိုးတိုးတက်ရေးတွင် သင်ရိုးညွှန်းတမ်း အခန်းကဏ္ဏ၊ ကိုရဲဝင်းက ၂၀၁၆-၂၀၁၇ ပညာရေးနှစ်တွင် ကျောင်းအပ်နှံခွင့် ငြင်းပယ်ခံရသော မသန်စွမ်းကလေးများနှင့် ကျောင်းတွင်တွေ့ကြုံရသည့် အခက်ခဲများစစ်တမ်း၊ ဒေါက်တာသိန်းလွင်က လက်ရှိနိုင်ငံရေးအခြေအနေအောက်က ပညာရေးပြောင်းလဲမှုကို သုံးသပ်ခြင်းဟူသည့် ခေါင်းစဉ်များဖြင့် ဟောပြောခဲ့ကြပါသည်။ ဆွေးနွေးပွဲသို့ ပညာရေးပြုပြင်ပြောင်းလဲရေးကို စိတ်ပါဝင်စားသည့် ဒေသခံများ၊ ဆရာဆရာမများ၊ အငြိမ်းစားပညာရေးဝန်ထမ်းများ၊ ကျောင်းသားသမဂ္ဂများ၊ ပညာရေးလုပ်ငန်း လုပ်ဆောင်နေသည့် အဖွဲ့အစည်းများ၊ NNER လုပ်ငန်းအဖွဲ့ဝင်များ၊ NNER ပြည်နယ်နှင့်တိုင်း ကွန်ရက်အဖွဲ့ဝင်များ တက်ရောက်၍ သိလိုသည်များကို မေးမြန်းဆွေးနွေးခဲ့ကြပါသည်။