Author: DPNS INFORMATION

၂၀၁၉၊ အောက်တိုဘာ ၂၀။ရန်ကုန်။ ===================================== “အမျိုးသမီးများနှင့် ရွေးကောက်ပွဲနိုင်ငံရေး” ခေါင်းစဉ်ဖြင့် ပြုလုပ်သော မြန်မာ့နွေဦးစကားဝိုင်းတွင် လူ့ဘောင်သစ်ဒီမိုကရက်တစ်ပါတီဥက္ကဋ္ဌ ဦးအောင်မိုးဇော် ပါဝင်ဆွေးနွေးခဲ့ပါသည်။ ထိုသို့ဆွေးနွေးရာတွင် အမျိုးသမီးများ ရွေးကောက်ပွဲတွင် ပါဝင်လာနိုင်ရေးအတွက် ယာယီ အထူးလုပ်ဆောင်မှု affirmative action ကို လုပ်ဆောင်ဖို့ အရေးကြီးကြောင်း၊ မူဝါဒများသည် စာရွက်ပေါ်မှာ ရှိရုံသာမကဘဲ အမှန်တကယ် အလုပ်လုပ်နိုင်ရန် gender budgeting အရေးကြီးကြောင်း၊ မြန်မာ့လူ့အဖွဲ့အစည်းတွင် ရိုးရာဓလေ့ထုံးတမ်းများကို ကျော်၍မရသေးဘဲ ပဒေသရာဇ်လူ့အဖွဲ့အစည်း ဖြစ်နေဆဲဖြစ်ကြောင်း၊ ဒီမိုကရေစီဝန်းကျင် ခိုင်မာရမည့်အစား နေရာတကာတွင် စစ်ဝါဒ လွှမ်းမိုးနေကြောင်း၊ စစ်ဝါဒသည် မဟာဖိုဝါဒ၏ အဓိကလက္ခဏာဖြစ်ကြောင်း၊ စစ်ဝါဒကိုဖယ်ရှားပြီး ဒီမိုကရေစီဝန်းကျင်ကိုဖော်ဆောင်ရမည်ဖြစ်ကြောင်း တင်ပြဆွေးနွေးခဲ့ပါသည်။

၂၀၁၉၊ အောက်တိုဘာ၊ ၁၉။ မန္တလေး။ I School Myanmar က စီစဉ်ကျင်းပသည့် “သဟဇာတဖြစ်မှုနှင့် လူတိုင်းအကျုံးဝင်မှု” Peace Forum ကို၂၀၁၉ အောက်တိုဘာ ၁၉ ရက်နေ့တွင် မန္တလေးမြို့ အောင်မြင်ခြင်းဟိုတယ်၌ ပြုလုပ်ခဲ့ပါသည်။ နံနက်ပိုင်းဆွေးနွေးပွဲတွင် DPNS တွဲဖက်အထွေထွေအတွင်းရေးမှူး(၁) ဒေါ်နှင်းနှင်းမွှေး လည်း ပါဝင်ဆွေးနွေးခဲ့ပါသည်။ ထိုသို့ဆွေးနွေးရာ၌ ဒီမိုကရေစီစံနှုန်း ၃ ခုဖြစ်သည့် လွတ်လပ်ခြင်း၊ တန်းတူခြင်းနှင့် သွေးစည်းချစ်ကြည်ခြင်းတို့ကို မဖော်ဆောင်နိုင်သည့်အတွက် ငြိမ်းချမ်းရေးမရရှိနိုင်သေးသည့်အခြေအနေနှင့် အမျိုးသမီးများ၊ လူငယ်များ နိုင်ငံရေးတွင် ပိုမိုပါဝင်လာစေရေးအပေါ် ပါတီ၏အလေးထားမှုကို တင်ပြဆွေးနွေးခဲ့ပါသည်။ နိုင်ငံရေးပါတီဝင်များ၊ မန္တလေးတိုင်း လွှတ်တော်ကိုယ်စားလှယ်များ၊ လူထုအခြေပြု အရပ်ဖက်အဖွဲ့အစည်းများ၊ မသန်စွမ်းအဖွဲ့အစည်းများ၊ LGBT အဖွဲ့များ၊ မီဒီယာများ ဆွေးနွေးပွဲတက်ရောက်ခဲ့ကြပါသည်။

၂၀၁၉ အောက်တိုဘာ ၁၇။ ဆားလင်းကြီး။ လူ့ဘောင်သစ်ဒီမိုကရက်တစ်ပါတီ တွဲဖက်အထွေထွေအတွင်းရေးမှူး(၁) ဒေါ်နှင်းနှင်းမွှေးသည် အောက်တိုဘာ ၁၇ ရက်နေ့လည်ပိုင်းတွင် ဆားလင်းကြီးမြို့နယ် ကံကုန်းရွာတွင် DPNS အမျိုးသမီးလုပ်ငန်းကော်မတီဝင်များ၊ ဒေသခံအမျိုးသမီးများနှင့် တွေ့ဆုံဆွေးနွေးခဲ့ပါသည်။ ထိုသို့ တွေ့ဆုံရာတွင် ပါတီခေါင်းဆောင်မှုအဆင့်ဆင့်နှင့် နိုင်ငံရေးတွင် အမျိုးသမီးများ ပိုမိုပါဝင်လာရေးအပေါ် ပါတီ၏သဘောထားနှင့် အလေးအနက်ထားမှုကို ရှင်းလင်းဆွေးနွေးခဲ့ပါသည်။ ဝါးစိမ်းတောင်အရေးအပါအဝင် ဒေသအခြေအနေများနှင့် ကြုံတွေ့နေရသည့် အခက်အခဲများကိုလည်း အပြန်အလှန် ဆွေးနွေးခဲ့ကြပါသည်။

၂၀၁၉ အောက်တိုဘာ ၁၅။ ပါတီဌာနချုပ်ရုံး ရန်ကုန်။ လူ့ဘောင်သစ်ဒီမိုကရက်တစ်ပါတီ ဗဟိုအလုပ်အမှုဆောင်ကော်မတီအစည်းအဝေးကို ၂၀၁၉ အောက်တိုဘာ ၁၅ ရက်နေ့တွင် ပါတီဌာနချုပ်ရုံး၌ ပြုလုပ်ခဲ့ရာ ပါတီဗဟိုအလုပ်အမှုဆောင်ကော်မတီဝင်များ တက်ရောက်ခဲ့ကြပါသည်။ အစည်းအဝေးတွင် ဆောင်ရွက်ထားရှိပြီးသည့် လုပ်ငန်းအခြေအနေများ၊ ဆွေးနွေးပွဲများ၊ စည်းရုံးရေးအခြေအနေများနှင့် ဆက်လက်ဆောင်ရွက်ရမည့် လူထုအခြေပြုလုပ်ငန်းများ၊ လူထုဆက်ဆံရေးလုပ်ငန်းများကို အသေးစိတ် ဆွေးနွေးညှိနှိုင်းခဲ့ကြပါသည်။