Day: July 7, 2016

လူငယ်စွမ်းရည်မြှင့်သင်တန်းကျောင်း (Youth Empowerment School) သန်လျင်တွင် ၇ – ၇ – ၂၀၁၆ ရက်နေ့က (၅၄) နှစ်မြောက် 7 July အခမ်းအနားကို ကျင်းပခဲ့ပါသည်။ ၎င်းအခမ်းအနားသို့ လူ့ဘောင်သစ်ဒီမိုကရက်တစ်ပါတီ အထွေ ထွေအတွင်းရေးမှူး ဦးငွေလင်းနှင့် ဗကသများအဖွဲ့ချုပ်နိုင်ငံခြားရေးရာကော်မတီဝင်ဟောင်း ဦးတင်အေးတို့ကို ဖိတ်ကြား ဟောပြောစေခဲ့ပါသည်။ ဦးတင်အေးက 7 July နေ့ ဖြစ်ပေါ်လာပုံသမိုင်းအကျဉ်းနှင့် 7 July စိတ်ဓာတ်အပေါ် ၎င်း၏ ခံစားချက်ကို ဆွေးနွေးခဲ့ပါသည်။ ဦးငွေလင်းက 7 July နှင့်ပတ်သက်၍ ယနေ့ကာလ ထားရှိရမည့် နိုင်ငံရေးတာဝန်များကို ဆွေးနွေးရာတွင် ဇူလိုင် ၇ ရက်သူရဲကောင်းစိတ်ဓာတ်အဓွန့်ရှည်ရေး၊ ဗကသများအဖွဲ့ချုပ် အဓွန့်ရှည်ရေး စစ်အာဏာ ရှင်စနစ်ကျဆုံးရေး၊ ၂၀၀၈ ဖွဲ့စည်းပုံအခြေခံဥပဒေ ကျဆုံးရေးတို့ကို အဓိကထား ဆွေးနွေးခဲ့ပါသည်။ YES ကျောင်းသူ ကျောင်းသားများက သိလိုသည်များကို မေးမြန်းဆွေးနွေးခဲ့ကြပြီး 7 July အမှတ်တရကဗျာများလည်း ရွတ်ဆိုခဲ့ကြပါသည်။ ထို့နောက် ကျောင်းသူကျောင်းသားများက မျိုးဆက်သစ် ကမ္ဘာမကြေသီချင်း ဂုဏ်ပြုသီဆိုကာ အခမ်းအနားကို ရုပ်သိမ်း ခဲ့ပါသည်။

ပြည်ခရိုင် ဗကသများအဖွဲ့ချုပ်က ဦးစီးကျင်းပသော (၅၄) နှစ်မြောက် ၇ ဇူလိုင် အခမ်းအနားကို ပြည်မြို့ အိုးဝေပညာဒါန ကျောင်းတွင် ၇၊ ၇၊ ၁၆ ရက်နေ့ နံနက်ပိုင်းတွင် ကျင်းပခဲ့ပါသည်။ အခမ်းအနားတွင် ပြည်ခရိုင်ဗကသဥက္ကဋ္ဌဟောင်း ဦးလှချစ်၊ ၁၉၆၂ ကျောင်းသားဟောင်း ဦးအုန်းကျော်၊ ဆရာကြီးသခင်ကိုယ်တော်မှိုင်း ငြိမ်းချမ်းရေးကွန်ရက် (ပြည်ခရိုင်)မှ ဦးချစ်ဆောင်ဦး၊ လူ့ဘောင်သစ် ဒီမိုကရက်တစ်ပါတီ ဥက္ကဋ္ဌ ဦးအောင်မိုးဇော်တို့က ဂုဏ်ပြုအမှတ်တရစကားများ ပြောကြားခဲ့ကြပါသည်။
ထို့ပြင် ဗကသများအဖွဲ့ချုပ်က ကြီးမှူးကျင်းပခဲ့သော တက္ကသိုလ်သမဂ္ဂများ နှီးနှောဖလှယ်ပွဲမှ ထုတ်ပြန်ချက်၊ လူ့ဘောင်သစ်ဒီမိုကရက်တစ်ပါတီဌာနချုပ်နှင့် ပြည်ခရိုင်၊ လူ့ဘောင်သစ်လူငယ်၊ ဗကသများအဖွဲ့ချုပ်၊ ဆရာကြီးသခင်ကိုယ်တော်မှိုင်း ငြိမ်းချမ်းရေးကွန်ရက် (ပြည်ခရိုင်)၊ နိုင်ငံရေးအကျဉ်းသားဟောင်းများအဖွဲ့(ပြည်)မှ ပေးပို့သော သဝဏ်လွှာတို့ကို ဖတ်ကြားပြီး ဂုဏ်ပြု ကဗျာများလည်း ရွတ်ဆိုခဲ့ကြပါသည်။
ပါတီ ဥက္ကဋ္ဌ ဦးအောင်မိုးဇော်က အမှတ်တရစကား ပြောကြားရာတွင် ဇူလိုင် ၇ အရေးတော်ပုံသည် မပြီးဆုံးသေးကြောင်း၊ ဗကသ မူ ၅ ချက်သည် ယနေ့အချိန်ထိတိုင် မှန်ကန်နေဆဲဖြစ်ကြောင်း၊ မြန်မာနိုင်ငံတွင် ဒီမိုကရေစီမရသေး၊ မငြိမ်းချမ်းသေး၊ စစ်အာဏာ ရှင်စနစ် မကုန်စင်သေးသဖြင့် ဆက်လက်ရုန်းကန်ကြရာတွင် ဗကသ မူ ၅ ချက်ကို ဆက်လက်ကိုင်စွဲ တိုက်ပွဲဝင်ရဦးမည် ဖြစ်ကြောင်း၊ အစဉ်အလာကြီးမားသော ဗကသသမိုင်းကို ရိုင်းအောင်လုပ်လျှင် လုပ်သူများ၏သမိုင်းသာ ရိုင်းမည်ဖြစ်ကြောင်း စသည့်အချက်များကို ထည့်သွင်းပြောကြားခဲ့ပါသည်။

လူ့ဘောင်သစ်ဒီမိုကရက်တစ်ပါတီဥက္ကဋ္ဌ ဦးအောင်မိုးဇော်နှင့် ပြည်ခရိုင်စည်းရုံးရေးကော်မတီတို့၏ အစည်းအဝေးကို ၇-၇-၂၀၁၆ ရက်နေ့ က ရွှေတောင်မြို့နယ် စည်းရုံးရေးကော်မတီရုံးခန်း၌ ပြုလုပ်ခဲ့ပါသည်။ ရွှေတောင်မြို့နယ်စည်းရုံးရေးကော်မတီရုံးခန်းဖွင့်ပွဲ နှစ်ပတ်လည် နေ့အခမ်းအနားအပြီးမှာ ပြုလုပ်ကြခြင်း ဖြစ်ပါသည်။အစည်းအဝေးတွင် ပြည်ခရိုင်ရဲဘော်များက လက်ရှိကြုံတွေ့နေရသည့် အခြေအနေ များ၊ အခက်အခဲများကို တင်ပြခဲ့ကြပြီး ဦးအောင်မိုးဇော်က မဟာမိတ်အဖွဲ့အစည်းများနှင့် ဆက်ဆံရေး၊ ပါတီတည်ဆောက်ရေး၊ စည်းရုံး ရေးလုပ်ငန်းများ တိုးချဲ့ဆောင်ရွက်ရေးတို့နှင့် ပတ်သက်ပြီး အကြံပြုဆွေးနွေးခဲ့ပါသည်။