ပါတီတံဆိပ်

ဆက်သွယ်ရန်

အမှတ်(၁၂၄)၊ စတုတ္ထထပ်၊ မဟာဗန္ဓုလလမ်းနှင့် ၅၇ လမ်းထောင့်၊ ပုဇွန်တောင် မြို့နယ်၊ ရန်ကုန်မြို့။
အီးမေးလ် – hqdpns@gmail.com
Facebook – Democratic Party for a New Society

ပြည်ခရိုင် လယ်သမားထု၏ ဆန္ဒဖေါ်ထုတ်ပွဲအား ကြိုဆိုထောက်ခံခြင်း

၂၀၁၄ ခုနှစ် ၊ မတ်လ ၊ ၂၉ ရက်။ ၁။ မြန်မာပြည်လယ်သမားထုသည် နိုင်ငံအဖြစ် စတင်ထူထောင်ခဲ့ကြရာ (၁၁)ရာစုကာလမှပင် ယနေ့အထိ အနိုင်ကျင့် ဗိုလ်ကျ ခံရမှု၊ သွေးစုတ်ချယ်လှယ်ခံရမှု၊ နိမ့်ကျသောထုတ်လုပ်မှုပုံစံကြောင့် စီးပွားရေးဘဝချို့တဲ့မှု၊ သဘာဝဘေးရန် မြေရှင်၊ငွေရှင် တို့၏ သီးစားခ၊ အတိုးကြီးချေးငွေ စသည်တို့၏ နှိပ်စက်ဒဏ်၊ အုပ်ချုပ်ရေး အာဏာစက် အဆက်ဆက်၏တာဝန်မဲ့မဲ့ လစ်လျူရှုခံရမှုဒဏ် စသည့်ဖိစီးမှုပေါင်းစုံအောက်ဝယ် လူချင်းမမျှသော လူမှုဘဝနိမ့်ကျခြင်းဒဏ်ချက်အမျိုးမျိုးကို စဉ်ဆက်မပြတ် ခံစားခဲ့ကြရသည်။ ၂။ ယနေ့ကာလ ဒီမိုကရေစီ အသွင်ကူးမှုဖော်ဆောင်နေကြောင်း ကြွေးကြော်နေသည့် အစိုးရလက်ထက်တွင်လည်း မကြာမီ ပြောင်းလဲ၊ရောက်ရှိလာဘွယ်ဖြစ်သည့် စီးပွားအခွင့်အလမ်းတို့အတွက် ဓနဥစ္စာ၊အခွင့်အာဏာတို့ကို အသုံးချပြီး အသင့်ပြင်နေကြကုန်သော စီးပွားရေးခရိုနီများ၊အာဏာပိုင်အဖွဲ့အစည်းများ၊အထွေထွေ အပြားပြားသော စီမံကိန်းများက မြေသိမ်း၊ယာသိမ်း အနိုင် ကျင့်မှုများကို အရက်စက်ဆုံး ကျူးလွန်ခံနေကြရပေသည်။ ၎င်း ဖိစီး၊နှိပ်စက်ဒဏ်များကို ကြံ့ကြံ့ခံ ရင်ဆိုင်ဖြေရှင်းရေးအတွက် ဥပဒေဖြင့် လုံလောက်သော အကာအကွယ်ပေးမှုလည်း မခံစားရ၊ တကိုယ်ချင်း၊တစုချင်း ဖြစ်နိုင်သမျှ ဥပဒေဘောင်တွင်းကြိုးပမ်းမှု အားလုံးလိုလိုသည်လည်း တည်ဆဲဥပဒေများကို ချိုးဖောက်နေသည်ဟု စွပ်စွဲခံရလျက် ပြစ်ဒဏ်အမျိုးမျိုး စီရင်ခံနေကြရသည်။ ကျေးလက်လူ့အဖွဲ့အစည်း၏ မိသားစုအသက်မွေးဘဝ ပြိုကွဲလျက် အရွယ်ကောင်း၊လုပ်အားရှိ လယ်သမားမိသားစုဝင်များမှာ မြေယာများကိုစွန့်ခွာပြီး မြို့ပြ လက်လုပ်လက်စားများအဖြစ် အဆက်မပြတ် မပြောင်းချင်ဘဲ ပြောင်းလဲနေကြရသည်။ ၃။ ပြည်ခရိုင်တွင်း လယ်သမားများမှာလည်း စီမံကိန်းများ၊ သ/မ အမည်ခံ ငွေရှင်များ၊ ဒေသတွင်းတပ်ဖွဲ့များ၏ အဓမ္မမြေယာ သိမ်းဆည်းခံရမှုကြောင့် ဧကသောင်းချီသောမြေယာဆုံးရှုံးမှု၊ မိသားစုဝင်သောင်းချီ၍ စီးပွားရေးဘဝ လူမှုရေးဘဝ ပျက်စီးမှုများခံစား နေကြရပြီး ပြန်လည်ရရှိရေး ကြိုးပမ်း၊အားထုတ်ရာအဆင့်တိုင်း၌ ဖိနှိပ်မှု၊မတရားမှုပေါင်းစုံကို အကာအကွယ်မဲ့စွာ ရင်ဆိုင်ခဲ့ကြရလေသည်။ လယ်သမားများနှင့် လယ်သမားအရေးကူညီအကျိုးဆောင်သူ အမြောက်အမြား ဖမ်းဆီး၊ရိုက်နှက်၊တရားစွဲဆိုခံကြရခြင်း၊ ထောင်သွင်းအကျဉ်းချခံရခြင်း၊ အချို့ အသက်ဆုံးရှုံးသည်ထိ တာဝန်မဲ့မဲ့ အနိုင်ကျင့်၊နှိပ်စက်ခံနေကြရခြင်းများနှင့် ရင်ဆိုင်နေကြရ ပေသည်။ ၄။ ၎င်း ပြည်ခရိုင် လယ်သမားထုကြီးက မိမိတို့ အခွင့်အရေး ရှိသည်နှင့်အညီ၊ “ သိမ်းဆည်းခံလယ်ယာမြေများ ပြန်လည်ရရှိ ရေး၊ ဖမ်းဆီးခံ လယ်သမားများ ပြန်လွှတ်ပေးရေး၊ လယ်သမားအခွင့်အရေး ကာကွယ်သည့် ဥပဒေပေါ်ပေါက်ရေး၊ လယ်သမား အရေး ပြဿနာများ ဖြေရှင်းရာတွင် တရားမျှတ၍၊ ဒီမိုကရေစီနည်းကျစွာ ယဉ်ကျေးစွာ ဆွေးနွေး၊ဖြေရှင်းရေး ” ဆိုသည့် မိမိတို့ လိုလားချက်များကိုစုစည်းညီညွတ်စွာ တောင်းဆို၊ဆန္ဒပြကြခြင်းအား မိမိတို့ပါတီက အပြည့်အ၀ ထောက်ခံ၊ကြိုဆိုပါသည်။ ဆက်လက်၍ မပြီးပြတ်နိုင်သေးသော လယ်ယာမြေနှင့် လယ်သမားလူထုအရေးများကို စံနစ်တကျ ကိုင်တွယ်၊ဖြေရှင်း နိုင်ရေး၊ လယ်သမား လူတန်းစားပြဿနာအဝဝကို ရင်ဆိုင်၊ဖြတ်ကျော်နိုင်ရေးတို့အတွက် ယခုစုစည်းညီညွတ်မှုကို ဆက်လက် ထိန်း သိမ်းလျက် မိမိတို့ လယ်သမားလူထုကြား သွေးစည်းမှု အခိုင်အမာရယူပြီး လွတ်လပ်သော ဒေသဆိုင်ရာ လယ်သမားသမဂ္ဂ ကြီးတရပ် စုဖွဲ့၊ပေါ်ပေါက်လာနိုင်သည်ထိ ကြိုးပမ်း၊အောင်မြင်ကြလိမ့်မည် ဟုလည်း ယုံကြည်၊မျှော်လင့်ပါသည်။ ၅။ ပြည်ထောင်စုအစိုးရ၊ ပဲခူးတိုင်းဒေသကြီးအစိုးရ၊ ခရိုင်အုပ်ချုပ်ရေးတာဝန်ရှိသူများအပါအ၀င် အာဏာပိုင်အဆင့်ဆင့်အနေဖြင့် မိမိနိုင်ငံသားတို့၏ အခြေခံအခွင့်အရေးများကိုလေးစား၊အသိအမှတ်ပြုလျက်၊ တရားနည်းလမ်းကျစွာ၊ဒီမိုကရေစီနည်းကျစွာ၊ ယဉ် ကျေး ထောက်ထားစွာလက်ခံ ဖြေရှင်းပေးကြပါရန် မိမိတို့ပါတီက အလေးအနက် တိုက်တွန်း၊တောင်းဆိုလိုက်ပါသည်။ ဗဟိုစည်းရုံးရေးကော်မတီ လူ့ဘောင်သစ်ဒီမိုကရက်တစ်ပါတီ(ဌာနချုပ်)

ဆရာကြီးသခင်ကိုယ်တော်မှိုင်း (၁၃၈) နှစ်မြောက်မွေးနေ့ အထိမ်းအမှတ်အခမ်းအနားသို့ ပေးပို့သော ဂုဏ်ပြုသ၀ဏ်လွှာ

ဆရာကြီးသခင်ကိုယ်တော်မှိုင်း (၁၃၈) နှစ်မြောက် မွေးနေ့အထိမ်းအမှတ် အခမ်းအနားသို့ မိမိတို့ပါတီက ၀မ်းမြောက်လှိုက်လှဲစွာဖြင့် ဤဂုဏ်ပြုသ၀ဏ်လွှာကို ပေးပို့အပ်ပါသည်။ ယနေ့ကာလ မြန်မာနိုင်ငံ၏ ရှေ့တန်းအရောက်ဆုံး နိုင်ငံရေးအကြောင်းအရာများ အနက် တခုမှာ အမျိုးသား ပြန်လည်သင့်မြတ်ရေးနှင့် ငြိမ်းချမ်းရေးလုပ်ငန်းစဉ်များကို အနှစ်သာရရှိရှိ အကောင်အထည်ဖေါ်ဆောင်ခွင့် ရ – မရ ဆိုသည့်အကြောင်းအရာဖြစ်သည်ဟု မိမိတို့ပါတီက ယုံကြည်ပါသည်။ နှစ် ၆၀ ကျော်ကြာ ဖြစ်ပွားနေသော ပြည်တွင်းစစ်ကြီး အပေါ်ထားသည့်သဘောထား၊ ဒီမိုကရေစီနှင့် လူ့အခွင့် အရေးကို အပြည့်အ၀ အာမခံနိုင်မှုအပေါ်ထားသည့်သဘောထား ၊ ပြည်ထောင်စုသားအားလုံးအတွက် အမျိုးသားတန်း တူခွင့်နှင့်ကိုယ်ပိုင်ပြဋ္ဌာန်းခွင့် အပေါ်ထားသည့် သဘောထားများသည် စစ်မှန်သည့်ငြိမ်းချမ်းရေး တည်ဆောက်ရေး အတွက် အခရာကျသော သဘောထားများ ဖြစ်သည်ဟု မိမိတို့ပါတီက အလေးအနက် ခံယူပါသည်။ တိုင်းရင်းသားလူမျိုးစုများအပါအ၀င် နိုင်ငံရေးအင်အားစုများအားလုံးအနေဖြင့် အထက်ပါကိစ္စရပ်များအပေါ် မှန်ကန်သော သဘောထားများ ကိုယ်စီကိုယ်စီ အခိုင်အမာ ရှိကြပြီး ဖြစ်သည်ဟု မိမိတို့ပါတီက နားလည်ပါသည်။ အစိုးရနှင့် တပ်မတော်အနေဖြင့်လည်း ခေတ်အဆက်ဆက် ဖိနှိပ်ရေးအစိုးရများနှင့် လမ်းခွဲကာ အထက်ပါ ကိစ္စရပ်များအပေါ် မှန်ကန်သောသဘောထားများ ချမှတ်ကိုင်စွဲသွားကြရန် လိုအပ်သည်ဟု မိမိတို့ပါတီက အလေး အနက် အကြံပြုတိုက်တွန်းအပ်ပါသည်။ တိုင်းရင်းသားလူမျိုးစုများအပါအ၀င် နိုင်ငံရေးအင်အားစုအားလုံး၊ အစိုးရကိုယ်စားလှယ်၊ တပ်မတော်သား ကိုယ်စားလှယ်များပါဝင်သည့် ပင်လုံညီလာခံကဲ့သို့သော ပြည်ထောင်စုညီလာခံကြီးတရပ် ကျင်းပပြီး ဆရာကြီးသခင် ကိုယ်တော်မှိုင်း၏ သူမနာကိုယ်မနာငြိမ်းချမ်းရေးမူကို အခိုင်အမာကိုင်စွဲကာ တည်ရှိနေသည့်ပြဿနာ အရပ်ရပ်ကို ဆွေးနွေးအဖြေရှာကြရမည် ဖြစ်ပါသည်။ ထိုသို့ တိုင်းပြည်နှင့် ပြည်သူတရပ်လုံး၏ အကျိုးစီးပွားကို တည့်တည့်မျက်နှာမူပြီး ဖြေရှင်းကြမှသာလျှင် ဆရာကြီးမျှော်မှန်းခဲ့သော ငြိမ်းချမ်းရေးကို စစ်စစ်မှန်မှန်ရရှိလိမ့်မည်ဟု မိမိတို့ပါတီက ယုံကြည်ပါသည်။ မိမိတို့ပါတီသည် အခက်အခဲ မည်သို့ပင်ကြုံရစေကာမူ အမျိုးသားပြန်လည်သင့်မြတ်ရေးနှင့် ငြိမ်းချမ်းရေး လုပ်ငန်းတာဝန်များကို လူမျိုးစုံပြည်သူလူထုကြီးနှင့် အတူ လက်တွဲထမ်းရွက်သွားမည်ဟု သန္နိဌာန်ပြုအပ်ပါသည်။ ဗဟိုစည်းရုံးရေးကော်မတီ လူ့ဘောင်သစ်ဒီမိုကရက်တစ်ပါတီ(ဋ္ဌာနချုပ်) ၂၀၁၄ခုနှစ် မတ်လ (၂၃) ရက်နေ့။

မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး(ABSDF)၏ ဒဿမအကြိမ်ညီလာခံသို့ပေးပို့သော ဂုဏ်ပြုသ၀ဏ်လွှာ

မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး၏ ဒဿမအကြိမ်ညီလာခံသို့ မိမိတို့လူ့ဘောင်သစ်ဒီမိုက ရက်တစ်ပါတီက လှိုက်လှဲဝမ်းမြောက်စွာဖြင့် ဤဂုဏ်ပြုသ၀ဏ်လွှာကို ပေးပို့လိုက်ပါသည်။ မိမိတို့နိုင်ငံသည် နိုင်ငံရေးဖြစ်ထွန်းမှုအသစ်များ တစုံတရာဖြစ်ပေါ်နေသည်ဆိုသည့်တိုင် လက်တွေ့ဘ၀တွင် လူမျိုစုံ မြန်မာပြည်သူများ ရင်ဆိုင်နေကြရသော နိုင်ငံရေး၊ စီးပွားရေး၊ လူမှုရေး ပြဿနာအရပ်ရပ်ကို ဖြေရှင်းပေးနိုင်ခြင်း မရှိသေးသည်ကို တွေ့မြင်နေကြရပါသည်။ ထိုပြဿနာများကို အပြည့်အစုံဖြေရှင်းနိုင်ဖို့ဆိုလျင် ဖွဲ့စည်းပုံအခြေခံဥပဒေ(၂၀၀၈ခုနှစ်)ကှို ဒီမိုကရေစီနှင့် တိုင်းရင်းသားတိုင်းအတွက် တန်းတူရေးနှင့်ကိုယ်ပိုင်ပြဋ္ဌာန်းခွင့် တို့ကို အပြည့်အ၀အာမမခံနိုင်သည့် ဖွဲ့စည်းပုံအခြေခံဥပဒေဖြစ်သွားအောင် ပြင်ဆင်ရေး၊ စစ်မှန်သောငြိမ်းချမ်းရေးကို အခိုင်အမာတည်ဆောက်ပြီး အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ကို အပြည့်အ၀ အာမခံသည့် ဒီမိုကရက်တစ်ဖက်ဒရယ်ပြည်ထောင်စုကြီးအဖြစ် တည်ဆောက်ရေး၊ အင်အားစုအားလုံးပါဝင်သည့် တန်းတူရည်တူတွေ့ဆုံဆွေးနွေးပွဲကြီး သို့မဟုတ် ပြည်ထောင်စုညီလာခံကြီးကို ကျင်းပပြု လုပ်ပြီး နိုင်ငံလုံးဆိုင်ရာ သဘောတူညီချက် (National Accord) တရပ် ချမှတ်ရေး၊ စသည့် လုပ်ငန်းစဉ် (၃) ရပ်ကို အမျိုးသားရေးလုပ်ငန်းစဉ်များအဖြစ် ချမှတ်ဆောင်ရွက်ကြရလိမ့်မည်ဟု မိမိတို့ပါတီက အလေးအနက် ခံယူပါသည်။ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦးနှင့် မိမိတို့ပါတီတို့သည် ညီနောင်အင်အားစုများဖြစ်ကြ သည့်အားလျော်စွာ အခြေအနေအရပ်ရပ်အပေါ် စဉ်းစားပုံ ကြည့်မြင်ပုံချင်း အခြေခံအားဖြင့် တူညီကြသည်ဟု မိမိတို့ပါတီက ယုံကြည်ပါသည်။ ဒဿမအကြိမ်ညီလာခံကြီးအောင်မြင်ချောမောစွာ ကျင်းပနိုင်ပါစေကြောင်း လှိုက်လှိုက်လှဲလှဲ ဆန္ဒပြုအပ်ပါသည်။ မြန်မာ နိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦးနှင့် လူ့ဘောင်သစ်ဒီမိုကရက်တစ်ပါတီတို့အနေဖြင့် ညီညွတ်သွေးစည်းစွာ လက်တွဲပြီး ယနေ့ကာလအမျိုးသားရေးတာဝန်များကို ကြိုးပမ်းထမ်းရွက်သွားကြဖို့ တပ်ဦး၏ညီလာခံကြီးတွင် အလေးအနက် ကတိပြုအပ်ပါသည်။ ဗဟိုစည်းရုံးရေးကော်မတီ လူ့ဘောင်သစ်ဒီမိုကရက်တစ်ပါတီ(ဌာနချုပ်) ၂၀၁၄ ခုနှစ်၊ မတ်လ (၇) ရက်

တောင်သူလယ်သမားဆိုင်ရာ တွေ့ဆုံဆွေးနွေးပွဲ (မန္တလေးမြို့) သို့ပေးပို့သော သ၀ဏ်လွှာ

မန္တလေးမြို့တွင် ကျင်းပပြုလုပ်သော တောင်သူလယ်သမားဆိုင်ရာ တွေ့ဆုံဆွေးနွေးပွဲသို့ တက်ရောက်လာကြသော တောင်သူ လယ်သမား ကိုယ်စားလှယ်များ၊ နိုင်ငံရေးပါတီများ၊ လူမှုရေးအဖွဲ့အစည်းများ၊ ဌာနဆိုင်ရာနှင့် သက်ဆိုင်ရာအဖွဲ့အစည်းများမှ ကိုယ်စားလှယ်များ စိတ်ရွှင်လန်းတက်ကြွမှုရှိကြပါစေကြောင်း မိမိတို့ လူ့ဘောင်သစ်ဒီမိုကရက်တစ်ပါတီမှ ဆုမွန်ကောင်း ပို့သအပ် ပါသည်။ မြန်မာနိုင်ငံ၏ ဖွံ့ဖြိုးတိုးတက်မှုသည် နိုင်ငံ၏လူများစုဖြစ်သော ဒေသအသီးသီးရှိ တောင်သူလယ်သမားများ ဘ၀မြင့်မားရေး၊ လယ်ယာမြေကဏ္ဍတိုးတက်ဖွံ့ဖြိုးရေးတို့နှင့် တဆက်တစပ်တည်း သက်ဆိုင်နေပါသည်။ ခေတ်အဆက်ဆက် တောင်သူလယ်သမား တို့၏ဘ၀အခြေအနေမှာ အဖိနှိပ်ခံနင်းပြားဖြစ်နေရမှု၊ ဆင်းရဲနိမ့်ကျနေရမှု၊ မတရားသဖြင့် လယ်သိမ်းယာသိမ်းခံနေရမှုနှင့်အတူ လယ်မဲ့ယာမဲ့ဘ၀ ရောက်ရှိနေရမှု၊ လယ်ယာမြေကဏ္ဍဖွံ့ဖြိုးတိုးတက်မှုမရှိဘဲ နိမ့်ကျနေရမှုများဖြင့်သာ ကြုံတွေ့နေခဲ့ကြရပါသည်။ ယင်းပြဿနာများကို ဖြေရှင်းနိုင်ရေးမှာ နိုင်ငံ၏ အရေးတကြီးကိစ္စရပ်ဖြစ်သည်ဟု မိမိတို့ပါတီအနေဖြင့် ခံယူထားပါသည်။ ယခုတွေ့ဆုံဆွေးနွေးပွဲကြီးမှ တောင်သူလယ်သမားတို့၏ စီးပွားရေး၊ လူမှုရေး၊ ဖွံ့ဖြိုးတိုးတက်ရေးတို့ကို မျှော်မှန်းကာ တောင်သူလယ်သမားများ၏ အခက်အခဲများ၊ ပြဿနာများကို တွေ့ဆုံဆွေးနွေးညှိနှိုင်းရန်ဆိုသည်မှာ ယနေ့မြန်မာနိုင်ငံတောင်သူ လယ်သမားများ၏ အခြေအနေနှင့် ကိုက်ညီသင့်လျော်သည့် ရည်ရွယ်ချက်တရပ်ဖြစ်ပါသည်။ လယ်ယာမြေဥပဒေ ပြုပြင်ပြောင်းလဲရေးနှင့် သိမ်းဆည်းခံလယ်ယာမြေများ ပြန်လည်ရရှိရေးဆိုသည်မှာ ယနေ့မြန်မာနိုင်ငံတွင် တောင်သူလယ်သမားများလက်တွေ့ကြုံတွေ့နေရသည့် အခြေခံပြဿနာရပ်များ အနက် အဓိကျသည့်ပြဿနာရပ်များဖြစ်ပါသည်။ မိမိတို့ လူ့ဘောင်သစ် ဒီမိုကရက်တစ်ပါတီအနေဖြင့် ယင်းပြဿနာများအပေါ်တွင် လယ်ယာမြေဥပဒေ တရပ်အနေဖြင့် ဒေသအသီးသီးရှိ လယ်သမားများ၏ စီးပွားရေး၊ လူမှုရေးဘ၀များကို အာမခံချက်ရှိစေရန်နှင့် ယင်း လယ်ယာမြေဥပဒေကို လွတ်လပ်သည့် လယ်သမားသမဂ္ဂများ၊ လယ်သမားအဖွဲ့အစည်းများနှင့် လယ်သမားကိုယ်စားလှယ်များကိုယ်တိုင် ပါဝင်၍ ပြုပြင် ပြောင်းလဲသွားနိုင်ရန် လိုအပ်သည်။ ယနေ့ နေရာဒေသအသီးသီးတွင် ဖြစ်ပေါ်လျက်ရှိသော သိမ်းဆည်းခံ လယ်ယာမြေများ ပြန်လည်ရရှိရေးအတွက် လယ်သမားလှုပ်ရှားမှု များသည် ခေတ်အဆက်ဆက် အုပ်စိုးသူ အာဏာပိုင်အဖွဲ့အစည်းများနှင့် စီးပွားရေးလုပ်ငန်းရှင်များမှ မတရားသိမ်းဆည်းခဲ့သည့် လယ်သိမ်း၊ ယာသိမ်းကိစ္စများကို မီးမောင်းထိုးပြနေခြင်းဖြစ်သည်။ ယင်းပြဿနာများဖြေရှင်းရန်အတွက် သက်ဆိုင်ရာအာဏာပိုင်များ အနေဖြင့် အကြောင်းအမျိုးမျိုးဖြင့် မတရားသိမ်းဆည်းထားသော လယ်ယာမြေစာရင်းများကို အတိအကျ ထုတ်ပြန်ပေးရန်၊ သိမ်းဆည်းလယ်ယာမြေများအား ပိုင်ဆိုင်သူလယ်သမားများအား ပြန်လည်ပေးအပ်ရန်၊ခေတ်ကာလနှင့် ကိုက်ညီသည့် လျော်ကြေးငွေများအား ပြန်လည်ပေးအပ်သွားရန် လိုအပ်သည်ဟု မိမိတို့ပါတီက သဘောထားပါသည်။ ထို့ပြင် လယ်ယာမြေပြဿနာများအားဖြေရှင်းရာတွင် သာမန်သီးခြားဥပဒေပြဋ္ဌာန်းပေးရုံဖြင့် မလုံလောက်ဘဲ တောင်သူ လယ်သမားများ၏ အခြေခံရပိုင်ခွင့်အတွက် နိုင်ငံတော်ဖွဲ့စည်းပုံအခြေခံဥပဒေအတွင်း အခိုင်အမာပြဋ္ဌာန်းအကာအကွယ်ပေးရန် လိုအပ်သည့်အလျောက် လက်ရှိဖွဲ့စည်းပုံအခြေခံဥပဒေပြင်ဆင်သွားရေးအတွက် လယ်သမားများကိုယ်တိုင် ကြိုးပမ်းပါဝင်သွားရန် လိုအပ်လျက် ရှိနေပါသည်။ ယနေ့ တောင်သူလယ်သမားဆိုင်ရာ တွေ့ဆုံဆွေးနွေးပွဲကြီးမှ တောင်သူလယ်သမားကိုယ်စားလှယ်များနှင့် သက်ဆိုင်ရာ ကိုယ်စားလှယ်အသီးသီးတို့မှ တောင်သူလယ်သမားတို့၏ စီးပွားရေး၊ လူမှုရေး၊ ဖွံ့ဖြိုးတိုးတက်ရေးတို့အတွက် အခက်အခဲပြဿနာရပ် များကို စိတ်လက်ကြည်လင်တက်ကြွစွာဖြင့် ဆွေးနွေးအဖြေရှာ ညှိနှိုင်းသွားနိုင်ကြပါစေကြောင်း ဆုမွန်ကောင်းပို့သရင်း ဤသ၀ဏ်လွှာ အား ပေးပို့အပ်ပါသည်။ ဗဟိုစည်းရုံးရေးကော်မတီ လူ့ဘောင်သစ်ဒီမိုကရက်တစ်ပါတီ။ ရက်စွဲ – (၅)ရက်၊ မတ်လ၊ ၂၀၁၄ခုနှစ်။